ភ្នំពេញ ៖ សង្កាត់ទួលសង្កែ១ ខណ្ឌឬស្សីកែវ  ត្រូវបានរដ្ឋបាលរាជធានីភ្នំពេញកំណត់ជាតំបន់ក្រហម តម្រូវឱ្យបិទខ្ទប់រយៈពេល ៧ថ្ងៃបន្ថែមទៀត។

អគ្គស្នងការរងនិងជាស្នងការនគរបាលរាជធានីភ្នំពេញ លោក ស ថេត នៅថ្ងៃទី២៩ ខែមេសា ឆ្នាំ២០២១នេះ បានចុះត្រួតពិនិត្យគោលដៅសង្កាត់ទួលសង្កែ១ ខណ្ឌឬស្សីកែវដើម្បីណែនាំដល់កងកម្លាំងទាំងអស់ឱ្យអនុវត្តការងារបានត្រឹមត្រូវ និងម៉ឺងម៉ាត់បំផុត ជាពិសេសក្នុងតំបន់រងការឆ្លងខ្លាំង ក្នុងតំបន់ក្រហម ដើម្បីចូលរួមបង្ការនិងទប់ស្កាត់ការឆ្លងរាលដាលវីរុសកូវីដ១៩។

គួរបញ្ជាក់ផងដែរថា រាជរដ្ឋាភិបាលកម្ពុជាបានសម្រេចបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល រយៈពេល១សប្តាហ៍បន្ថែមទៀត ដើម្បីទប់ស្កាត់ការរីករាលដាលជំងឺកូវីដ១៩ រហូតដល់ថ្ងៃទី០៥ ខែឧសភា ឆ្នាំ២០២១ ព្រមទាំងបែងចែកកំណត់ជា «តំបន់ក្រហម» «តំបន់លឿងទុំ» និង «តំបន់លឿង»។

រយៈពេលនៃការបិទខ្ទប់នេះ អាចត្រូវបានបន្តបន្ថែមទៀត អាស្រ័យលើការចូលរួមអនុវត្តរបស់ប្រជាពលរដ្ឋនៅក្នុងតំបន់បិទខ្ទប់ និងស្ថានភាពនៃការវិវត្តនៃការឆ្លងរាលដាលនៃជំងឺកូវីដ-១៩។

នេះបើតាមសេចក្តីសម្រេចរបស់រាជរដ្ឋាភិបាល នៅល្ងាចថ្ងៃទី២៦ ខែមេសា ឆ្នាំ២០២១។ សេចក្តីសម្រេចនេះនឹងចាប់ផ្តើមអនុវត្តចាប់ពីម៉ោង០០៖០០ចូលថ្ងៃទី២៩ ខែមេសា ឆ្នាំ២០២១៕